Электронлă вулавăш

Кун хыççăн кун вĕлтлетсе иртрĕ. Микола яланхи пекех кашни ир ĕçе çӳрерĕ, таврăнчĕ. Юлашки вăхăтра канмалли кун пулманпа пĕрех. Ялан таçта каймалла, тем ĕçпе чупмалла. Хуçин тăван ялне пĕр вуннă та çитсе килчĕ пуль. Ытла нумай чупрĕ çак юлашки кунсенче. Çывăрса тăранма май çук. Хĕр анса юлнă çул пăрăнчăкне тем пек çаврăнса килесшĕнччĕ вăхăт çитереймерĕ. Тепĕр тесен, ăнах тупатчĕ пулĕ-ха, анчах ăшри вăрттăн чару хумĕ вăшăлтатма тытăнать те, каллех вара тăхтаса пăхма шутлать. Ыран терĕ пĕрре, ыран çитсен тепĕр кун терĕ. Çапла кунран кун хăварса тахçан шутланă шухăшне пурнăçа кĕртеймерĕ. Майĕпен вара çав хĕре сайра аса илчĕ, кăштахран ун сăнарĕ куç умне тăрсан-тăрсан кăна килсе курăнма тытăнчĕ.

Пĕррехинче темле майлаштарса ĕçрен иртерех пушанса машинине лартрĕ те хăйĕнни патне кайма пуçтарăнчĕ. Алик вăл иртерех ирĕкленнине ăçтан пĕлсе тăрать-ши тата? Гараж алăкне хупса пĕтереймерĕ - телефон сасси янăраса та кайрĕ. Пĕр тăхтаса тăмасăрах таçта кайса килмелли пур тесе самаях вăлтрĕ Миколăна. Тĕнче пысăкăш ĕç тумалла иккен паян вĕсен. Енчен те çакна кая хăварсан ун пекки нихăçан та пулас çук, «Питĕ вăйлă хĕрпе паллаштаратăп сана, — шăл йĕрчĕ вăл. Ыран шăмат кун. Канмалли кун. Паян кăштах уçăлса çӳреме те юрать. Атту эс укçа çапса хĕрсемпе йăпанмаллине те манса кайрăн. Йӳтесе кайса туя çине тăрсан тин мĕн тума кирлĕ сана хĕр!» Вăт, мĕн тăвăн-ха çав эсремете? Ун шăл йĕрсе пултăр. Хваттерлĕ, аякриех мар тăванĕ ăна пĕр пӳлĕмлĕ хваттер çырса парса хăварать тет иккен. Уншăн чăххи çичĕ çăмарта харăс тунăшăн хĕпĕртекен автан пекех савăнать ача. Шельмă, ăнать пурнăçра çынсене. Укçи-тенкине кĕреçепе хырать теççĕ. Хăй вара кун пирки халь çапса пăрахатăп тесен те каламасть. Миколăн вара çич хут тар тапса тухиччен тăрăшмасăр кĕсьере пĕр тенкĕ те шăнкăртатмасть. Шупашкарта тăванĕ-пĕтенĕ те çук та ун, ăçта унта хваттер парнелекен! Общежитире пурăнса йăлăхрĕ ĕнтĕ, хăйне валли уйрăм хваттер илес тесе тем пекех мекеçленет пулин те хальлĕхе ниепле те алли-урине çавăрса илеймест. Пĕрре шутласа хунă вăрттăн шухăшсене пурнăçа кĕртме вăй çитнĕ таран тăрăшать-ха вăл, хăçан та пулсан кил-çурт çавăратех хулара. Амăшĕн вăрттăн шухăшĕ те ăна тахçантанпах канăç памасть тата. Хулара йăва çавăрмалла тенĕччĕ вĕт-ха. Халĕ вĕсен вăхă-тĕнчи пек хăв ĕçлекен организацинче черете тăрса патшалăхран тӳлевсĕр хваттер илме çук. Иртрĕç çав ылтăн вăхăтсем. Ĕçлесе туянмалла е май килнĕ чухне улталаса е çаратса укçа çапса хваттерлĕ пулмалла. Ун пек хăтланакан çынсем пирки сахал мар илтнĕ Микола. Хăть мĕн хăтланччăр ара, хăйсенне хăйсем пĕлĕç. Улталани-çаратни пачах та лайăх мар япала та-ха. Микола ун пек хăтланма пĕлмест, ашшĕ-амăшĕ ăна тӳрĕ чунлă пулма воспитани панă çав. Çавăнпа ĕçрех вăйпа тăрăшать те ĕнтĕ. Унăн ашшĕ-амăшне, йăмăкне хăйĕн хулари хваттерне илсе килсе кăштах та пулсан пурăнтарса пăхас килет. Уйрăмах амăшне. Мĕн тери пысăк ĕмĕт пулнă вĕт-ха ун хулара тĕпленсе кун-çула ирттересси. Ашшĕ сăмахĕнчен иртеймен ĕнтĕ. Тату та пĕр сăмахран пурăнакан çемьере пĕр-пĕрин сăмахне яланах итлеççĕ çав. Ялтах юлнăран кăмăлĕ питех те пăсăлнă пулин те амăшĕ нихăçан та çакăншăн ашшĕне ӳпкелесе калаçнине илтмен вăл. Тата хăçан та пулсан хирĕçнĕччĕ-ши вĕсем? Каллех илтмен. Тен, вăл салтакра чухне тĕркĕшкелесе илнĕ? Çук пуль, килте тем сиксе тухнă тăк, йăмăкĕ çырса пĕлтеретчех ăна кун пирки.

Алик сĕнĕвĕпе килĕшрĕ Микола. Ĕçе пуçĕ-кучĕпех тăрăннипе пурнăçа ирттерме çуккине тăнласа хăйĕн те хĕрсемпе кăштах айкашса-якăлтатса çӳрес килчĕ. Хирĕçлесен хыт кукар тесе сĕмрен кăларать тата Алик.

— Чиперккесемшĕн укçуна хĕрхенетĕн, конешно, нихăçан та авланма кăна мар, кăшт ларса калаçмалăх хĕр те тупаймастăн ак, — ятлаçам пекки те тунă ăна тусĕ. — Пуçу тавралла шутласа пăх-ха: мĕн интереспа пурăнатăн эсĕ? Укçа хутаççи пуласшăн-и? Миллионера тухас тетĕн-и? Пулмасть сан пеккинчен. Миллионера тухас пулсан малтан çынна улталама вĕренмелле хальхи пурнăçра е çӳлте ларакансем хушшинче «батька» тупмалла. Вĕсем хăйсене эсĕ кирлине туйса илсен сĕтĕрсе кăларма пултараççĕ çын çине. Çук пулсан вара — таптаса хăварма та именмеççĕ, Мекĕрлемсе пурăннипе пурнăç сакки сараймăн, — тенĕччĕ пĕрре ăна Алик чи ăслă философ пек сăмахне çавăрса хурса.

— Пурте сан пек мар-çке, мана никам та парне паракан çук, хам тумасан кама шанас? — тусне капла каласа кӳрентерессе те шутларĕ вăл, анчах Алика вăр-варах сăмахпа ӳпне хураймăн.

— Сан уншăн кĕвĕçмелле мар, савăнмалла кăна тусна çавăн пек шăпа парнеленĕшĕн. Май килсен эп те сана ура çинчех йĕркеллĕ утса çӳреме пулăшатăп-çке.

— Тав сана, эс пулмасан хальччен саплăксăр тум та тăхăнаяс çук ĕнтĕ эп, — шӳтлерĕ Микола.

— Тумне туянăн-ха, анчах авланайманни вара паллă! Атя, лăпăртатса ан тăр, кайрăмăр! — Вăл пулас тĕл пулу адресне каларĕ.

Хула тепĕр вĕçне кĕрлеттерчĕ икĕ çамрăк. Пĕр тăхăр хутлă çурт умĕнче Алик чарăнма ыйтрĕ.

— Çакăнта кĕтсе тăр, çиччас илсе тухатăп вĕсене, — тесе вăр-варскер çурт подьездĕнче çухалчĕ.

Нумаях ларма тивмерĕ Миколăн. Кĕçех Алик хĕрпе тухрĕ. Пĕрремĕш хут курать ăна Микола. Юлташĕ тахçан темиçе хĕрпе те паллаштарнăччĕ, анчах ку вĕсенчен пĕри пулмарĕ. Çамрăкскер тата, çирĕм çулсене çитнех пуль. «Вăт парать Алик, — вĕчĕрхеннĕн шутларĕ Микола хăй çумĕнче çакăн пек чиперкке çуккипе юлташне кĕвĕçнĕн. — Эй, иртнинче курнă чухне урăххипеччĕ, вăл та аптăрамасть пекчĕ-çке. Халĕ теприне хĕстерме те ĕлкĕрнĕ».

— Ку ман тус, Микола ятлă. Шутсăр тирпейлĕ те асаплă çын, — терĕ Алик хĕре ун умне çавăтса пырса. — Халиччен хĕр мĕнне тĕлĕкре те курманскер. Уншăн хĕрпе арăм ак çак, — машина капотне аллипе лап-лап тутарчĕ вăл. — Ку вара Наташа — эп уншăн çак самантрах вилме хатĕррине яланах пĕлсе тăракан пике, — хыçалти алăка яриех уçрĕ те сылтăм аллине малалла тăсрĕ. — Ларма пултаратăр, чиперккем. — Хăй те салона кĕрсе вырнаçсан сăмахне татах малалла тăсрĕ вăл. — Халĕ вара Микола валли хĕр шырама каятпăр. Юрать-и, Наташа? Ун патĕнче пире кĕтсе ларма сăмах панăччĕ пĕри, темшĕн килеймен тата, — чарăнмасăр пакăлтатрĕ Алик. Ăçтан сăмахне тупать-ши, калама сывлăшне çитерет-ши? — Юрĕ, темех мар, Наташа вăл ăçта пурăннине пĕлет. Атя, вĕçтерер.

Чипер хĕр икĕ рет шап-шурă шăлĕсене кăтартса йăл-йăл! кулчĕ те адрес каларĕ. Ак тата, Микола пурăнакан урамрах иккен ун пулас «савнийĕ»? Вăл пурăнакан çуртран инçе те мар! Ăна урисене сĕтĕрейми лачкам ӳсĕр чухне те шыраса тупать. Тьфу-тьфу, мĕскер эрех пирки аса илчĕ вара вăл, халиччен кĕленче пăккине уçса шăршлаканччĕ çеç-çке? Алик теме сйстерсе йăл! та йăл! çиçет тата. Çак ачан чее пуçĕнче кашни çеккунтрах плансем çуралаççĕ те, вăл мĕншĕн çиçнине ăнланса пĕтерме те çук.

— Ну, пулать те паян кану каçĕ! Вара хĕрĕ килтех тĕк ăçта кайăпăр-ха? — канăçне йăлт çухатнă ĕнтĕ вăл, пĕр самант шăп ларсан та уншăн хăрушă трагеди сиксе тухĕ. Хăех калатчĕ мар-и тата тахçан хĕрсемпе юнашар чухне чĕмсĕрленме юрамасть тесе? Калаçсан-калаçсан çавах сăмах вĕçне тухма май пур тет вăл. Анчах ытлашширех сӳпĕлтетсен çупкă çиесси те инçе мар. «Фу-у, санпа!» — тесе тутисене пăрса сивлемен пуль-ха ăна халиччен.

— Пĕлместĕп. Сан плансем мĕнле, ман нимĕнли те çук, — хуравларĕ

Микола.

— Манне кайран пĕлĕр, халĕ Наташа каланине итле эс, — çавăрса хучĕ Алик.

— Эпир сирĕнпе кĕçĕр пĕр пĕчĕк вечеринка ирттересшĕн, хирĕç мар пулĕ? — чĕлхи салтăнма пуçларĕ курăнать хĕрĕн. Тусăма кĕрсе илĕпĕр те çут çанталăкпа киленме кайăпăр. Пĕр-пĕр хваттерте ларсан та пăсмасть пуль.

«Охо! — тăн! пырса çапрĕ Микола пуçне шухăш. — Харсăрлăхне Турă панă кăна. Тем, путлĕ хĕрех çаклатман эс, Алик. Çулне кура мар çавăн пекрех туйăнать. Юрĕ, пурăнсан курăпăр-ха унта мĕнле кайăк эс: çунатна хуçнă-и е халĕ те сывлăшрах ярăнса çӳретĕн».

Наташа сăмаха тӳрех вечеринка пирки тапратнăран Микола иккĕленме тытăнчĕ. Мĕнле хĕр-ха вăл, паллашса пĕтеймен — уйрăм хваттерте ларасси пирки уççăнах пĕлтерет. Ун пек улах вырăнсене кайсан сĕтел çине хаяр шĕвек лартмасăр та пулмасть-ха, вара киккирики хĕрсен çемçе вырăна тӳнесси кăна юлать. Кайран?.. Темĕн, темĕн, ытла та çăмăлттай мар-ши эс, сарă çӳçе çивĕт пекки туса янă чиперукăм? Ун пек йăлтти-ялтти хĕрсемпе çыхланасах килмест Миколăн. Вĕсем улахра ларнинчен ытла кĕсье тĕпне самаях çутатаççĕ. Ун вара кун пек тĕллевсемех çук-ха. Вăл та темех мар-ха, укçине ĕçлесе илме пулĕ, виç сăмах хушичченех эрех-сăра лĕрккесе лартса вырăн еннелле сĕтĕрекен хĕрсене чăтма пултараймасть Микола. Çакăн пек хăтланасси халĕ модăна кĕчĕ-ши — камран кăна илтмест пулĕ ĕнтĕ вăл çакăн йышши вечеринкăсем ирттерни пирки. Лешĕ тата мĕнле тĕнче кĕрчĕ-ши? Ку çапласкер те, тусĕ те аптăрасах каймасть, ӳксех юлман пуль. Эс хăв камне кала та, тусу кам иккенне вара эп калăп... Тĕрĕсех шутлаççĕ пуль çав ăслă çынсем. Пĕри тепринчен ирттермесен юрать-ха. Пĕтрĕ вара Микола, ĕмĕр асăнмалăх каç пулать вĕт! Тата лешне ăна валли çураçасси паллă ĕнтĕ. Кăмăлне аçа çапса кайсан та Миколăн ун чун ыйтнине тивĕçтермелле-и? Темле икĕ ураллă упăте сиксе тухать ĕнтĕ умне, Килĕшмест ку, ай, килĕшмест! Халех кăмăл ун пек çаврăнчĕ те, каç мĕнле иртĕ? Наташи çумра пулмасан Алика урапа айне те хума хатĕрччĕ çак самантра Микола. Вăл ун пек çын маррине пĕлсе тăрсах йĕкĕлтет вĕт-ха ача!

Машина проспекта шуса тухса палланă урама хăй тĕллĕнех тенĕ пек вĕçтерчĕ. Светофорăн хĕрлĕ çутисем те чăрмантармаççĕ тейĕн. Акă Наташа каланă çурт, подьезд.

— Наташа, тусна кĕрсе чĕнсем, — ачашшăн сĕнчĕ Алик хĕре паçăрах аллинчен тытса пыраканскер.

— Çук, эпĕ мар, Микола чĕнтĕр. Хваттер номерне калăп та.

— Палламан çынсен алăкне мĕнле шаккăп-ха? — тĕлĕнчĕ Микола. -Картлашкасемпе кустарса антарсан?

— Сана унта никам та кустарас çук, — сисмесĕрех «сана» çине куçрĕ Наташа. — Лена пĕчченех. Ман шутпа, эсĕ кĕрсе чĕнсен аванрах пек туйăнать.

— Мĕн кутăнланса ларатăн эс какая каяс вăкăр пек? — Алик айне хурт ернĕ тейĕн, канăçсăррăн йăшăлтатать кăна ларкăч çинче. И Каланă -итле. Паян хĕрсем командирсем, эпир — итлекенсем.

— Кала эппин хваттер номерне, — аллине лашт! сулчĕ Микола. Таçта шалта, чун тĕпĕнче, тепĕр самантран тем пуласса систернĕн тахăш нерв çиппи кăрнт! туса туртăнчĕ. Мĕне хирĕç каять вăл, ăçта хăвалаççĕ ăна çаксем — йăлт арăш-пирĕшленчĕ. Çак самантра Микола пукане театрĕнчи пукане пекех туйрĕ хăйне. Унпа выляççĕ, ăна вăйпа калаçтараççĕ, темĕн тутараççĕ.

Наташа каланă хваттер улттăмĕш хутра-мĕн. Лифтран тухсан сылтăмалла пăрăнмалла. Икĕ хваттер пулмалла кунта, пĕри виçĕ пӳлĕмлĕ, тепри иккĕллĕ. Каланă номере шыраса тупса Микола виçĕ пӳлĕмлин шăнкăравĕ çине пусрĕ. Темле кайăк сассипе илемлĕн янăраса илчĕ шăнкăрав. Шалта сас-чӳ илтĕнмерĕ. Татах тепре, хальхинче нумайрах пусса тăчĕ.

Кăштахран, «кайăк» юрласа пĕтерсен, хваттерте ура сасси илтĕннĕ пек туйăнчĕ. Унтан çăра шаклатрĕ. Алăк яри уçăлчĕ те Микола умне чечеклĕ халат тăхăннă йăрăс пӳллĕ хĕр тухса тăчĕ. Пĕтрĕ! Каччă ют планета çинчи çынна курнăн хытса тăчĕ, çăварĕ тем самантра типсе ларчĕ. Çавă, вăрман патне антарса хăварнă пирĕшти! Çĕр çăттăр, ăçтан тупăнчĕ, çакăнтах çапса пăрахатăп тесен те Микола кунта курас тесе сунман çын! Наташа тусĕ? Паян каç Аликпа пĕрле вечеринка тума хатĕрленнĕскерсем? Мĕншĕн çĕр çаврăнать-ши пĕрех хут! Наташа каланă ĕнтĕ ăна паян икĕ каччă уяв каçне пĕрле ирттерме хатĕррине. Улахра, никам курман çĕрте. Тен, ун хваттерĕнче? Ахальтен-им паçăр пĕр-пĕр хваттерте тесе систерчĕ Наташа? Мĕн тумалла кун пек чух? Пĕртен-пĕр çăлăнăç: тармалла. Йăнăш лекрĕм тесе палламан пек пулса каçару ыйтмалла та шăлмалла намăс курса пĕтиччен. Микола нихăçан та шутлайман çак хĕр каччăсемпе вечеринкăсем тума кайма пултарасса. Этем пуçĕ хăйне килĕшекен сăнара яланах тирпейлĕ те хитре, пуринчен лайăххи тесе сăнарлать те, анчах чăн пурнăçра яланах шухăшлани пек мар иккен. Вара çак хĕр те /тен, арăм? Аллинче çĕрĕ пурччĕ мар-и?/ ют каччăсемпе янкăлтатса çӳрет-и? Эх, таса сăнарччĕ, урăхла шутланă пулсан çав вăрмана çитсе ун чухнех улах тăвĕччĕ-и Микола унпа? Кĕске юбка тăхăннă хĕр каçа хирĕç инçе çула шоферпа пĕччен ларса тухать-и?..

— Каçарăр... Эп йăнăшрăм пулас, мана 101-мĕш хваттер кирлĕччĕ, -хĕр пичĕ çинче çиçекен йăлтăр кулă ирĕлтернĕрен-и е нумай анраса тăни хăйне сутни пулниех пулнине ăнланни-ши Микола чĕлхине хус-катрĕ. Вартах çаврăнчĕ те картлашкасемпе анма тăчĕ. Анчах хĕр ăна палларĕ:

— Çук-çук, ун пек хăтланма кирлĕ мар, эсир тĕрĕсех килнĕ, — терĕ малалла иртсе. — Сире эпĕ кирлĕччĕ-и?

— Пĕлместĕп, такама чĕнме кĕртсе ячĕç, хваттерсене арпаштартăм... -чарăнса тăчĕ Микола.

— Ăнланатăп, ун пекех пăлханма кирлĕ мар. Тата, пĕр-пĕрне пĕрремĕш хут курмастпăр пулас эпир. Сире Наташăпа Алик янă, çапла-и? Эппин, тĕрĕсех.

Пĕтрĕ пуç! Наташи тарам-ха, анчах Аликне тата ăçтан паллать-ха ку? Тен, Микола пирки те тĕпĕ-йĕрĕпех пĕлет? Алик каласа панă пуль те. Алик... Алик... Хĕрсемпе каятпăр тенĕ чухне ахальтен йĕлпĕртетрĕ-и вăл? Вăт концерт та спектакль. Вĕсем режиссерĕсем, Микола вара артист, сцена çинче выляканни? Мĕнле роль суйласа панă ăна паян? Лекет санă Алик, ах, лекет те! Рольне маларах вĕрентмеллеччĕ! Куракан умĕнче намăс кăтартас терĕн-им?

— Сире паллатăп, — терĕ хĕр. - Тĕрĕссипе каласан, лайăхах мар ĕнтĕ, анчах машинăпа иртсе кайнине пĕрре мар курнă. Эсир çул çине тухсан тавралла пăхмастăр курăнать. Çак çурт урлă общежитире пурăнатăр. Мана пĕрре яла та леçнĕччĕ. Халь те паллаймарăр-и вара?

— Халь аса илтĕм, — ăнсăртран пуçран çапса анратнă хур аçи пек минресе тăнипе ним усси çуккине туйса хăйне алла илчĕ Микола. — Анчах сире темиçе хут курман. Яла леçнĕ чухнехине кăна астăватăп.

— Çапла çав эсир, арçынсем, — хаш! сывларĕ хĕр. — Сирĕн куçсем çиччас теприн çине сиксе ӳкеççĕ те малтанхи пирки вара мансах каятăр.

— Сирĕнпе асра тытмалли нимĕн те пулман та, — йĕкĕлтешсе теме систерсе илес терĕ Микола.

— Паллах, иккĕн юлса вăрттăн юрату тусан кăна асра хăваратăр çав пире е ун хыççăн та манса каятăр, — самантрах хĕп-хĕрлĕ сăн çапрĕ питне. «Вăтанма та пĕлет иккен», асăрхама ĕлкĕрчĕ Микола. — Наташăпа тата Аликпа ман пата эсир килессе пĕлетĕп. Кĕтнĕччĕ... — сасартăк алăка шалт! хупса çухалчĕ хĕр.

Микола хытсах кайрĕ. Ак тамаша! Туртисене сăлтавсăрах пăрма, мăртлатма та пултарать иккен ку чиперкке! Халь мĕн, Миколăн ун умне чĕркуçленмеллеччĕ-и? Тупăннă суперфрау, чăлт! сурать те ак Микола, çиелтен хваттер алăкне урипе тăрслаттарса хăварса килне тухса вĕçтерет. Наташăпа Алик? Мĕн вара? Пĕр-пĕр кафере антарса хăварĕ. Эсремет хĕрĕ, пăхăнтаратăп терĕ пуль! Шиш! тенине илтмен пуль-ха эс!

Микола картлашкасем тăрăх чупсах анса кайрĕ. Виççĕмĕшне çитсен урисем сасартăках тăлланчĕç, пуçне шухăш çапрĕ: «Мĕн тăватăп-ха? Çапла кӳрентерме юрать-и вара?» Тен, хĕр юриех ăна кĕтсе килтех ларнă? Каларĕ вĕт. Çук, Микола ун пек çын мар. Хĕрсемпе ытлах çепĕçех калаçсах каймасть те, хальхинче вара чун-чĕри урăхла хушать. Пĕрре хăлха чикки те çитернĕччĕ вăл тахăшне. Лешĕ ытлашши пуçне каçăртса ăна тем те пĕр каласа пĕтерчĕ. Тытрĕ те янклаттарчĕ. Тӳррĕн, водительсем пек. Кунпа ун пек пулмалла мар. Урăхла çын, чĕрере ăшă хум вĕлкĕштерекенскер...

Çаврăнчĕ те темиçешер картлашка урлă сиксе тем самантра хайхи хваттер алăкĕ умне çитрĕ. Шăнкăрава пусмарĕ, алăка çине-çинех чышки-пе хуллен тăнклаттарчĕ. Ăна питĕрмен те иккен! Хуллен чĕриклетсе уçăлса кайрĕ. Вăт самана, хĕр ăна кĕтнĕ-им, хыççăн пырасса шаннă-им? Тин кăна тутине тăсса кĕрсе каймарĕ-и вара? Микола хуллен хваттере иртрĕ. Шăп, калăн, кунта никам та çук. Таçта шалта кĕвĕ илтĕнет. Кăшт маларах утрĕ те чарăнса тăчĕ. «Пăрахса каяс темерĕр-им?» — шартах сиктерчĕ ăна хĕр сасси. Микола пĕр вырăнтах çĕр сакăр вун градус çаврăнчĕ те ăна курчĕ. Кухньăран тухнă иккен. Çав халатпах, тирпейлĕ пуçтарнă çӳç, çăтса ямалла илемлĕ пит-куç. Халь тесен халь ыталаса илсе хăй çумне нихçан уйăрмалла мар çыпăçтарса хурас килчĕ Миколăн ăна. «Çакă вăл, çакă, сан иккĕмĕш пайĕ», — тенĕнех тăлтлатса тапрĕ чĕри. Мĕнле-ха капла, иккĕмĕш хут кăна курать вĕт, чунра вара тĕнче пысăкăш çулăм ялкăшать. Тӳнет, кĕçех тӳнет те Микола çак хваттертех юлать. Çăва тĕпне кайччăр Аликпа Наташа, машину-пуçу та кирлĕ мар. Мĕн вечеринки унта, акă вăл тăрать, хваттерте никам та çук пуль урăх? Халех, çак самантрах калас ăна курнăранпа чунра мĕн çуннине. Манса кайнă пек туйăннăччĕ ун сăнарне, анчах чун-чĕрепе ăс-пуç ăна вăхăтлăха, тепре тĕл пуличчен çеç шаларах пытарса усранă иккен. Ак халĕ, вăхăт çитрĕ-ши, каллех вут-кăвар сирпĕнтерме тытăнчĕ. Çаврăнсан-çаврăнсан хăçан та пулсан каллех пуçланă тĕле тепĕр хут пырса тухатăн теççĕ те, Микола шăпи çапла çулпа йĕрлесе чуптарчĕ-ши?