Электронлă вулавăш

Ăшă çумăр çурĕ,

Çĕр шывпа йĕпенчĕ.

Васкамасăр утрăм,

Уçăлса, çулпа.

Ак, куратăп: иккĕн —

Ачапа ун амăш —

Сывламашкăн тухнă

Уçă сывлăшпа.

Кайăксем юрлаççĕ.

Йăл кулать хĕвелĕ.

Асамат кĕперĕ

Утăмлать инçе.

Чĕвĕл-чĕвĕл саслă

Пĕчĕк хĕрачашăн

Курăнать илемлĕн,

Чаплăн çут тĕнче.

Мĕн пурне курасшăн

Та тытса пăхасшăн,

Ĕмĕтсем çунатлă

Пĕчĕк чиперккен.

Тинкерсе пăхать вăл

Çĕр çине ачашшăн:

Уншăн çутçанталăк —

Уçă кĕнеке.

Ăмăртса вĕçеççĕ

Икĕ шурă лĕпĕш,

Çумăр хыççăн тухнă

Çĕр çине ăман.

Çăвăнса тасалнă

Курăксем сип-симĕс,

Питĕ илĕртеççĕ

Çаруран чупма.

Хĕрача хаваслăн

Кулчĕ, чĕвĕлтетрĕ.

Çутă ун пуласлăх,

Паянхи кун пек.

Шухăша кайса эп

Ерипен утатăп...

Каялла ачалăх

Килмĕ манăн тек.