«Куçсем тĕнче хапхи пек аслă...»

Куçсем тĕнче хапхи пек аслă,

Тĕнче пек вĕçĕмсĕр куçсем...

Иртнĕ кунсем-и е пуласлăх —

Телейĕ, мăшкăлĕ, асапĕ,

Тасалăхĕ е ырă чапĕ —

Йăлтах сан аллунта, куçсем!

Сан куçусем — тупан çинчи чĕре пек,

Чунпа туятăп эп вĕсен вăйне,

Витĕр курса тăратăп эпĕ —

Кашни вылявĕ, йăлтăравĕ,

Йăваш е чеерех ултавĕ

Касать ман шанчăк çунатне.

Чĕре суйсан, куçсем асапланаççĕ.

Чун ыратать ăшра ултав тăрсан...

Ан тив, анайтăр сĕм пĕчченлĕх каçĕ —

Ман пĕр асап, пĕр кĕрешӳ, пĕр парăм

(Кунçулăм сарăмсăр е сарăм) —

Телейлĕ эп эсĕ телей курсан!

1967, çĕртме, 11,

Шупашкар, Гелмгольц ячĕллĕ сыватăш.

Çĕнĕ комментари хуш