Каçармашкăн пĕлĕп-ши?

Василий Шихранов | Сăвă | 575


Сарă кайăк юрла-юрла

Ывăнса та çитрĕ-ши?

Савнă тусăм мĕне пула

Сивĕ куçпа пăхрĕ-ши?

Сарă кайăк сад пахчинчен

Вăрманалла вĕçрĕ пуль?

Савнă тусăм, пирĕн çинчен

Çын сăмахĕ илтрĕ пуль?

 

Çичĕ хурăн хушшинчех-çке

Аташмашкăн пулать-ши?

Çын сăмахĕ илтнипех-çке

Сивĕнмешкĕн юрать-ши?

Çичĕ хурăн хушшинчех пуль

Аташмашкăн кирлĕ мар.

Çын сăмахĕ илтнипех пуль

Сивĕнмешкĕн аван мар!

 

Сарă кайăк çуркуннепе

Каллех юрă пуçлĕ-ха...

Савнă тусăм ӳкĕннипе

Епле куçран пăхĕ-ха?

Тăм тивсессĕн сар çеçкине

Чĕрĕлесси пулĕ-ши...

Мана шанман чун савнине

Каçармашкăн пĕлĕп-ши?

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: