Электронлă вулавăш

Çӳл ту çинчи çил арманĕ

Çил вĕрсен çеç авăрать.

Калаçма юратакан Самойлов мана хăй ĕçленĕ район, ытти районеемпе танлаштарсан, чылай малта пыни çинчен каласа кăтартрĕ.

— Çав çитĕнӳсемпе мухтанма пултараймастпăр-и-мĕн? — тесе ыйтрĕ те вăл ответне те хăех каларĕ: — Мухтанма пултаратпăр. Центр пулăшсан, тем те туса лартăпăр. Ĕçрен хăрамастпăр эпир. Килес çула кирпĕч завочĕ лартасшăн-ха. Постановление йышăнса хуни виçĕ уйăх. Центр пулăшсан — пулать.

— Ăçта лартасшăн эсир ăна?

— Ав çавăнта.

— Çĕмрĕк çил арманĕ хыçне-и? Районти ытти армансем те япăхса кайнă иккен. Çул тăршшĕпех вăрçса килтĕм. Ма юсаттармастăр?

— Юсама материал çук. Центр пулăшсан, вăл армансене веçех юсаса лартма пулать.

— Ну? Сирĕн йывăç сахал-и-мĕн?

— Сахал мар та... Йывăçран аптрамастпăр. Вăрманта пурăнатпăр теме те юрать.

— Мĕн кĕтетĕр апла?

— Центр пулăшасса кĕтетпĕр.

— Вăрман касма-и?

— Вăрман касма мар. Каснă вăрмантан шыв ураписем, çил алăкĕсем, тырă ураписем, шакмаксем, арман çуначĕсем, арман хӳрисем тума.

— Специалистсем çук-им?

— Специалистсем пур... Тата, каласан, арман чулĕсен кăшăлĕсене, йĕнерсене, йĕке тăпсисене тата ыттисене те тимĕртен тунă вĕт. Вĕсене юсама пултаракан кадрсем кирлĕ.

— Тимĕрçсем çук-им?

— Вĕсем те пур.

— Пур пулсан, тутарас пулать.

— Центр пулăшмасан та-и?

— Центр çине шан та, ху та алла усса ан лар.

— Центр пулăшмасан тума лайăх мар.

— Ма лайăх мар?

— Хăнăхманран пулас. Пĕр-пĕр çĕнĕ ĕçе центр хушмасăрах пуçласа ярсан, темскер çитмен пек туйăнать вара; ĕçес килет тесен, ĕçес килмест — тем çитмест. Центра: «Пире çав-çав ĕçе тума çав-çав япаласем, калăпăр, çавăн чухлĕ йывăç, е кирпĕч, е чул, е хăйăр, тăм парăр», — тесе хут çырса ярсан, вăл-ку лăштах пулать, — терĕ.