«Тен, сукмак та

«Тен, сукмак та — анлă...»

Тен, сукмак та — анлă,

Тен, мăн çул та — ансăр...

Япăххи те пулнă, лайăххи те сансăр.

Ир — ӳксе йĕмелĕх, каç — каçса каймалăх.

Савăнăç та хуйхă — талăк хыççăн талăк.

Тĕпĕр-тĕпĕр саслă тĕлсĕр ир те каçшăн

Мĕншĕн шухă кăмăл халĕ хуçăласшăн?

Эп мĕне ĕненĕп, çутă хĕвеле-и? —

Пĕр енчен хуралĕ, тепринчен хĕрелĕ.

Япăххи те пулĕ, лайăххи те халĕ,

Çăлтăр йăлтăр! ӳкĕ — ӳкĕ те çухалĕ.