Мухмăрла Михала

Çĕпритун Шăпчăк | Шӳтлĕ сăвă | 1935 | 1 192


Эх, Михала, Михала!

Часрах ĕçе каймалла.

Анчах эсĕ мухмăрла.

Пуç ыратать пулмалла?

Пуç, пуç, пуç, пуç.

Шыçса тухнă хăрах куç.

Мухмăр тени мĕн тени?

Кĕленче тĕпне йĕрлени.

Çут кĕленче тĕпĕнче

Михалашăн çут тĕнче.

Ух, ух, ух, ух.

Киле çитме хăват çук.

Киле каяс вырăнке

Лекнĕ çырма варрине.

Çырма тĕпĕ — лачака.

Михала, ав, — пылчăка.

Рас, рас, рас, рас.

Пылчăкран мĕнле тухас?

Каччин-каччин качаки

Хӳре тăратса çухăрать.

Пирĕн Михала ухмаххи

Лачакара кăшкăрать.

Ит, ит, ит, ит...

Чăннипелех ку камит.

Тăрать, тăрать, тăраймасть,

Ура ярса пусаймасть.

Ни малалла-каялла.

Хăш еннелле каймалла?

Пылчăкалла,

Татах, татах шалалла.

Пылчăк çине йер тăвать,

«Чĕрĕ хаçат» кăларать.

Чăр-чăр вăл чĕркелет,

Ӳкерчĕксем йĕркелет.

Акă пулчĕ.

Тинех тĕнче кулчĕ!

Эх, Михала, Михала,

Кĕсъе тĕпне хыпала.

Сылтăм кĕсйӳ тĕлĕнче

Пушă çутă кĕленче.

Че, че, че, че.

Юлнă-ши хăть тĕпĕнче?

Савни тесе Михала

Чĕнет шатра шапана.

Чăмать татах шалалла

Тытас тесе хăй çавна.

На, на, на, на.

Савса чĕнет шапана.

Чăнкăр-чăнкăр шелешни

Турти çукшăн кӳлĕнмест.

Пирĕн Михала кĕлетки

Ӳсĕрришĕн çĕкленмест.

Хап-хап хапăсса!

Ăçта хурас намăса?

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: