Электронлă вулавăш

Пĕр станцире пирĕн вакуна шукăль тумланнă çамрăк пырса кĕчĕ те, кĕнĕ-кĕменех, проводница çумне çыпçăнчĕ.

— Вакунта çын мĕншĕн нумай? Ăçта лармалла кунта? Вырăн çук çĕре билет ма сутаççĕ?

— Вырăн пур. Ак кунта, хамăр çума килĕр, — тесе, эпир ăна вырăн тупса патăмăр.

Хăй ĕçĕпе унта-кунта çӳренĕ хыççăн, проводница пирĕн пата пычĕ. Шукăль каччă каллех ун çумне çыпçăнчĕ:

— Вакунта мĕншĕн пăчă? Кантăксене уçмастăр, пассажирсемшĕн тăрăшмастăр! — тет.

— Халĕ каçа хирĕç аптăрамалла мар, кăлăхах тиркешетĕр, — терĕмĕр эпир.

Шукăль пассажир пирĕн еннелле кăн-н пăхрĕ те: «Мĕнле кăлăхах? Мĕнле апла? Вăкунта çакăн пек пулмалла-и? Мĕншĕн вĕсен хутне кĕретĕр?» — теме тытăнчĕ.

Каярахпа вăл шыв ĕçме кайрĕ. Вăл чĕрре кĕрсе тавлашни аякранах илтĕне пуçларĕ:

— Шыв мĕншĕн сивĕ? Мĕншĕн вĕретместĕр? Çынна мĕншĕн хисеплеместĕр?

— Вĕретнĕ, ара, сивĕнчĕ пуль, — терĕ проводница.

Разъезда çитрĕмĕр. Вунă минут тăмалла. Шукăль пассажир унăн-кунăн уткалама тапратрĕ:

— Мĕншĕн капла нумай тăратăр? Мĕнле йĕрке ку? Çитес çĕре хăçан çитмелле?

— Эсир ытла канăçсăр-çке. Ара, поезд шăп та лăп расписанипе çӳрет, — ăнлантарчĕç ăна пассажнрсем.

Шукăль пассажир, ним тăвайман енне, пирус кăларса тивертрĕ.

— Юлташ, ан çӳплĕр кунта, — асăрхаттарчĕ ăна проводннца. — Çӳплеме юрамасть.

— Вăл санăн ĕç. Ăна санăн пуçтармалла. Сана çавăншăн укçа тӳлеççĕ, —хаярлансах кăшкăрчĕ пассажир.

Вакунри çынсем тӳсеймерĕç, пурте ăна хирĕç калама тытăнчĕç:

— Шăрпăк эсĕ! Пур çĕрте те чĕрре кĕретĕн, хăвăн ним йĕрки çук, — терĕç.

Чăтаймарĕ курăнать шукăль пассажир. Аллине лашт сулчĕ те урăх вакуна куçма шутларĕ. Васканипе пĕр хĕрарăма тĕксе ӳкерчĕ, ача ури çине таптарĕ, хăй каялла çаврăнçа пăхмарĕ.