Электронлă вулавăш

Унеçĕм ĕçкĕре-хăнара

Ĕçрĕ ăш сăра:

— Лайăх тунă сăрине,

Яма пĕлнĕ хăмлине.

Кăпăклă,

Ĕçме вăхăтлă, —

Пуплесе илчĕ сăмах майĕпе,

Йăвашшăн ерипе.

— Нимех те хатĕрлемен те эпĕр...

Сăри килĕшет пулсан, ĕç-ха тепĕр...—

Тыттарчĕ килхуçи арăмĕ алтăр.

«Унеçĕм хырăмĕ сарăлтăр», —

Терĕ пулас ăшĕнче.

Çавăн пек туйăнчĕ куçĕнчен.

— Хать тесен хатĕрех!

Ах, сăри сим пекех! —

Çавăрса хучĕ Унеçĕм виççĕмĕш алтăр.

Епле çивĕч те паттăр!

— Кавруç!

Пăх кунта: укçа пĕр ывăç.

Хушатпăр пулĕ çуттине?

Вĕçтер сăмакунçă патне! —

Хĕрсе çитнĕ Унеçĕм

Тăпăртатрĕ пĕр вĕçĕм,

Укçисене силлесе,

Эрех валли пиллесе

Пачĕ Кавруçа!

— Ме, пул хуçа!

Тупса кил эрех.

Ĕçетпĕр пурпĕрех!..

Вĕçтерчĕ Кавруç Унеçĕм укçипе

Вăрттăн, сарайсем хыçĕпе —

Эрех шырама —

Кайри урама.

Кавруç часах таврăнать,

Хаяррипе хăналать.

Ĕçеççĕ эрех

Пĕр черкке, тепре...

Ĕçнĕ хушăрах

Тиврĕ пĕрне сахалрах:

— Черет сиктертĕн!

— Эс кампа пуплетĕн?!

— Кам патĕнче хăнара?

Пул шăпрах!

— Кам кунта хуçа?

— Ан çĕкле пуçа!

— Кирлĕ-им сана?!

Тӳрлетĕп сăмсуна! —

Пуçланчĕ харкашу.

Чышу, çапу, çуйхашу.

Чикеленчĕ Унеçĕм алăк урлă —

Хытах лектерчĕ тахăш мурĕ.

Унеçĕм чăлах юлчĕ сарăмсăр,

Ларать халь хăрах алăсăр.

Кавруç ларать тĕрмере...

 

* * *

Çапла пулать вăл ĕçкĕре.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн