Электронлă вулавăш

Б. Л. Пастернака

Таçта пек — çакă тĕм. «Вăл — çакă»

теме те çук пек... Çĕр каçах

шур садăн пуш архипелагĕ

шав сарăлать пек, — анратсах!

Юрпа çав тĕм хушши — пĕр сассăр,

пĕр йĕрсĕр, çутăсăр тĕнче.

Турат мĕлки çуралаймасăр

тӳрех путать ун ыйхинче.

Унччен ун сĕмĕ çуралсаччĕ,

çукран пур пулнă пек, кăртах, —

юр çутипе тăванлашсаччĕ

малтан, тен, куçсене шартсах, —

черчен пĕр кĕрешӳ пуçланчĕ

кайран вĕсемшĕн çак садра, —

ик енлĕн ирĕлсе çухалчĕç

вĕсем пĕр пĕтĕм артакра...

Халь — çук мĕлке те, юр çути те! —

Çак куç курми мĕлке анчах

сас-чӳсĕр тарăн ыйăх витĕр

ырса чĕтрет пек, — хĕл каçах...

Çак тухату — сасартăк иртĕ:

вăранĕ юр çути мартра,

чуна чун кĕнĕ евĕр, витĕ

турат мĕлки те сив юра, —

мĕлке вăййи аса илтерĕ

е тĕлĕкри сăрт-ту йĕрне,

е хут çине ача ӳкернĕ

тĕс-йĕрĕн сапаланчăкне.

Халь — тĕлĕк çеç... Анрав артакĕ... —

Вăл пирĕн пурнăç çумĕнче

гипнозлă музыка пек... — Акă,

янрать пек кантăк леш енче...

Янрать — сас-чӳсĕр. Лăпкă. Тарăн.

Шиклентерет пек çĕрĕпех —

пĕр-пĕр сăнав лабораторин

синкерлĕ сывлăшĕ пекех...