Электронлă вулавăш

Ӳпĕнтернĕ çунасен

ялтăран тупанĕсем

çиçнĕ пек — аса илсен —

арматура каштисем.

 

Эп вĕсем çине тăрса

çавăратăп патьене,

лумпалă хуллен пăрса

эп уçатăп ун люкне.

 

Кашласа бетон юхать,

тăкăнать вак чул кайран,

бетона лексе янрать

умлăн-хыçлăн аялтан.

 

Кондор-кайăк пек вĕçсе

каялла каять патьен.

Ăшă çил хуллен килсе

ачашлать мана питрен.

 

Çил вылять те çил кĕрлет,

кăшкăраççĕ «Шкодăсем».

Аялта, инçе, рет-рет —

бетонланă сăвайсем.

 

Инçетри таçти Неван

çыранне пăхса ларан

мăн сфинкссем пекех вĕсем —

бетонланă сăвайсем.

 

Çил кĕрлет те çил вылять...

Эй, сфинкссем, мĕнле сăмах

пытанса сирте ларать —

ак халь-халь янрассăнах?

 

Сăмах мар ку, ку мана

музыка пек туйăнать —

хум çапать, кана-кана

асамат çиçсе вылять.

 

Аялта хĕрсем ян-ян

кăшкăрни, МАЗсен сасси

çавăрать пуçа... Унтан

хумлăн-хумлăн вĕри си

 

ман юна хĕрӳн куçать

кĕрлесе те янраса.

Манăн пĕтĕм пурнăçа

аслă музыка туса

янăрас вĕри сассем

 

халь пĕрремĕш çĕкленсе

янăраççĕ — пуçласа,

сарлакан хăватланса.

 

Ман чи хаклă самантсем!

Манăн пĕтĕм кун-çула

музыка туса ялан

янратса тăрас сассем!

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн