Реквием мĕлки — инçетрен

Геннадий Айхи | Сăвă | 1957 | 1 745


Çапла, пĕлетĕп: ун чухне

ман тĕксĕм тупăк умĕнче

вĕсем те тăрĕç. Сан çине

хăйсем сисмесĕр — тайăлса

тинкерĕç — кĕрĕн вĕçĕнче

хуйăрланса та хуралса

тĕксĕмленен уçланкăри

çутта çухатнă пек — вĕсем

сасартăк туйĕç: çав вĕри

илем — шевле — çав çутă,

çав таса илем, манра сӳнсе

санра ялтра пуçланине.

Ун чух çеç вилĕп. Канăçа

ун чух хăварăп вĕсене.

 

Вара тинкер эс — эп сӳнсен —

ман питĕме. Вара ăнлан:

кĕрлевлĕ пурнăç вырăнне

мана вĕсем — унтан-кунтан

касса, сыпса, сутса, — аран

асаплă ĕмĕр панине.

Юлашки хут лачкам шӳсе,

йăлт çемçелсе, вĕриленсе

пĕр-ик сăмах — юлашки хут! —

каланă чух та — эп вĕсен

алли çине тĕршĕннине

ăнланăн эсĕ — ман çине,

шур маска пек хытса пырса

улшăнакан питĕм çине

çав кун юлашки хут пăхса.

Эп вилĕме аса илсен

вĕсем шанмаççĕ. Эс пĕлен:

пĕр уйăх пурăнăçăм ман

вĕсен пĕр ĕмĕрне тăрать.

Ку калаçу — вĕсемшĕн мар,

вĕсенни чухлĕ пурнăçа —

эпир ирттернĕ. Хам хуçа

эп хамăн пĕтĕм пурнăçра.

Эп вĕсене çĕнме, манма

пултараймарăм. Эп кулма

пултараймарăм — вилнĕ чух.

Эп кулаймарăм — пĕр сана

кĕтсе илейменрен кăна.

Мана пурăнтарса, мана

вĕлернĕ вăхăтра пĕччен

пулма хăвартăм эп сана,

пĕртен-пĕр ман вĕренекен.

Çав вăхăта пĕлтерекен

пĕр япала та эп хамран

хăвармăп... Симĕссĕн çиçен

шĕвек те. Явăнмĕ мăйран

синкер йăлмак та. Юлĕ ман

тур панă пек таса, хĕрӳ

упраннă çуттăм çеç... Санра

вăл ялтăратăр вăйлăрах...

Çак пулĕ манăн çĕнтерӳ...

Çак тивĕçпе — халал, хевте

тивĕçĕпе ыйтап санран:

Эп сӳннĕ чух — эс çун. Эс кул —

ху сӳннĕ чух... Эс — эпĕ пул,

эс кул!.. Кайран, сăну хытсан,

ялтратăр кулă... Ман ăса

юнра çунан илем туса

упранă кулă — сан ӳтӳ

тасан, илемлĕн ăшăтса

упранă çуттăм — сан хевтӳ,

сан хавалу — эс ху, эп хам,

ман ĕмĕр вĕçленми шăпам!

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: