Электронлă вулавăш

Эп — Чăваш,

Пытармастăп ютран.

Эп — Чăваш, —

Вăтанмастăп унран.

Йăваш? Çук!

Мăнкăмăллăх пур ман.

Мĕскĕн? Çук!

Хальччен намăс курман.

Тивĕçлĕх?

Ют çынран кая мар.

Çепĕçлĕх?

Шăнчăкпа юнашар.

Çав-çавах

Мĕскĕн, теççĕ, пире.

Тур çырлах!

Çӳхе, теççĕ, пире.

Кам кăна

Шăл йĕрмешкĕн пăхман?

Ăс-тăна

Çĕлен евĕр сăхман?

Ют çынран

Чăваш пач катăк мар,

Тен, ăсран

Тарăнрах та тымар.

Кам ĕçчен?

Вăл — чăваш этемми,

Ĕç тесен —

Ăна йăлт шăл çемми.

Юрăсем

Пирĕн питĕ нумай.

Ташăсем

Çаптаратпăр ай-хай!

Эрешсем

Илĕртеççĕ куçа.

Яш-хĕрсем

Ытараймăн курса.

Мĕн çитмест

Пурнăçа ăнланма?

Мĕн çитмест

Чăваша çынланма?

Мĕскĕнлĕх?

Хамăртан вăл килет.

Тĕттĕмлĕх?

Тăрăшсан вăл вилет.

Кар тăрса

Пĕр йыша хутшăнсан,

Ăнтăлса

Пĕр-пĕрне ал парсан,

Чăваш пур,

Çĕр çинче пурăнатъ.

Унăн, кур,

Ĕçĕ-хĕлĕ ăнать.

Эп — Чăваш, —

Пытармастăп ютран,

Эп — Чăваш,

Вăтанмастăп унран,

Эп — Чăваш!..

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн