Чи тутлă çимĕçлĕ çеçкеçĕм

Эп Сан валли кĕпе çĕлетĕп

Тур панă чунăм çиппинчен.

Ырми-канми ăна тĕрлетĕп,

Сĕвем тухмасть чун йĕппинчен.

Çут тĕнчене манса ĕçлетĕп —

Тĕлĕннипе çут тĕнчерен.

Шавлатăп, савăнап, кĕрлетĕп —

Хумсем чӳхеннĕн тĕрлĕрен.

Тăван чĕлхеçĕм — ман кĕпеçĕм,

Çут тĕнчере пĕрре кăна.

Чи тутлă çимĕçлĕ çеçкеçĕм

Хăват парать — тулса юна!

Вăл пулмасассăн — эпĕ юнсăр,

Эп — тăлăх, хуçăлнă турат.

Ĕмĕрлĕхех юлатăп чунсăр —

Шутлатăп та — чĕре сурать!

Вăл пур чухне — эп чĕрĕ, сывă,

Ман ятăм та хитре — чăваш!

Çавна пулах кăварлă сăвă,

Нихçан пулман эпир йăваш!

Мĕн ачаран çакна пĕлетĕп,

Çакна шанатăп виличчен!

Чĕлхе валли кĕпе тĕрлетĕп —

Тур панă чунăм çиппинчен!

Çĕнĕ комментари хуш