Электронлă вулавăш

Хурах ятпа сана пĕлетпĕр.

Урак та Вырăх тенисем

Хурах тени кăна пулать-мĕн.

Хурах тесен те сумлă паттăр

Йышне кĕретĕн эс паян.

Чăвашлăхран писмерĕн эсĕ,

Ăна упрасшăн ăнтăлса

Мăсăльманла йĕрке тытмарăн.

Тытнах пулсан — чăваш кун-çулĕ

Кĕскелнĕ пулĕччĕ пайтах.

«Тăван чĕлхе те хамăр Турă

Епле-ха манăçтăр вара? —

Çапла татса каларăн хьптăн.

Асаттесем пире ылханĕç,

Кун памĕç пурнăçа тăсма.

Ай-хай Алмуш! Исламсăр-мĕнсĕр

Хăпмашкăн çук-им хасартан?

Багдадăн хӳглĕхĕ — самантлăх,

Вăйпа тĕне кĕртме ан хуш.

Курсам: икке пайланчĕ халăх,

Йăхсем ахаль те туслă мар.

Пире чăмăртаса тăрайĕ

Ĕмĕртенхи тăванлăх çеç.

Хам ятăма улăштараймăп,

Манаймăп хамăр чĕлхене.

Сăвар, пăлхар та парăс йăхĕ

Исламланса пĕтесшĕн мар.

Вăл йышланса çаплах пурнасшăн,

Киремете асла хурать.

Ав Чĕкету чапа кăларчĕ

Чӳк вырăнне Çăв çырминче.

Асту, Алмуш, килес кунсемшĕн

Пĕрлех тӳр килĕ кĕрешме.

Сăвар йăхне суран тусассăн

Суранланма ан тивтĕр сан...»

Сăвар сăмахĕ çакăн евĕр

Халь илтĕнсе тăрать пире.

Чăваш пулса юлма хускатнă

Çак ĕç паян та пурăнать.

Куратпăр, вăл Алмуш пуçарнă

Ĕç хӳттинчех упранчĕ-мĕн.

Кун-çул хистенĕ çуралмашкăн

Чăваш, ислам йăлисене.