Электронлă вулавăш

Астăватăп: ман ват асанне

Пуçтаратчĕ пире хăй патне.

Юмахлатчĕ темччен хăш чухне,

Ас илетчĕ пулса иртнине.

 

Сывламасăр эпир айвансем

Шăп çеç ларнă ăна тăнласа.

Вăл каланă юмах-халапсем

Пире янă ялан шухăша.

 

Паянччен юлнă ман асăмра

Пĕринче асанне калани:

«Пирĕн ял çумĕнчи çырмара

Тахçан пулнă арманăн пĕви.

 

Çак арманăн хуçи, Кавĕрле,

Çынсене çын тесе те картман.

Нихăçан та сĕм тĕттĕм çĕрле

Çемйипе килĕнче çывăрман.

 

Хăй шутланă усал ĕçсене

Пурнăçланă çынсем çывăрсан.

Вăл мĕнле хаяр çын пулнине

Ял çынни шутлама та хăйман.

 

Усалпа пĕр чĕлхе тупнине

Сăмахланă ялта темĕнччен.

Çырмари Кавĕрлен пĕвине

Хуралланă шуйттан пĕр-пĕччен.

 

Çак пĕве çывăхне нихăçан

Пĕр этем те хăйман çывхарма.

Шăп вун иккĕ çапсассăн шуйттан

Аннă тет шыв тĕпне çывăрма.

 

Ирчченех шалтăртатнă арман

Таврана хăрушла кисретсе.

Пĕр кĕтмен чух тата хушăран

Такам кулнă çĕре чĕтретсе.

 

Сар хĕвелĕ тухсан тӳпене

Тин лăпланнă хăрушă арман.

Сĕм çĕрле мĕн пулса иртнине

Ялĕпе те никам ăнланман.

 

Пĕр кĕтмен çĕртенех пĕринче

Шăп лăпланнă хăрушă арман.

Ни каçпа, ни çур çĕр варринче

Арманта тек никам ашкăнман.

 

Тулхăрман тет хăрушшăн пĕве

Çынсене ыйхăран вăратса.

Пач çухалнă ялтан Кавĕрле —

Тупайман виçĕ кун шыраса.

 

Кавĕрлен пулнă хĕрĕ — Черчен —

Чи илемлĕ пике таврара.

Çак ялта ку хĕре халиччен

Никамах та хăйман юратма.

 

Кавĕрле çухалсан уйăхран

Сарăлать пĕр хыпар таврана:

Унăн хĕрĕ каçхи вăйăран

Темшĕн кайнă хайхи армана.

 

Таврăнман тет Черчен хăй килне.

Çын пĕлмен вăл ăçта кайнине.

Çак каçран пуçласа ăнсăртран

Шавламашкăн пуçланă арман.

 

Сас-хура та тухать ял çине:

Шуйттан савнă чипер Черчене.

Анчах ашшĕ, пуян Кавĕрле,

Парас çук шуйттана хăй хĕрне.

 

Пурнăçланă шуйттан хăй ĕçне —

Кавĕрле халь тытать пĕвене.

Çук чăрмав шуйттан çулĕ çинче,

Пĕр Черчен çеç усал пуçĕнче.

 

Пĕринче илĕртсе Черчене

Çитерет вăл арман пĕвине.

Кавĕрле сассипе калаçса

Пĕтерет Черчене пăтратса.

 

Çавăрасшăн пулать вăл хĕре,

Ылтăн-кĕмĕл cĕнет пĕр кана.

Анчах савĕ-ши çамрăк чĕре

Çак хăрушă, тискер шуйттана?

 

Урса кайнă шуйттан Черчене

Путарать тет арман пĕвине…

Хăй пĕлмесĕр мĕскер тунине

Кавĕрле çинĕ хĕрĕн пуçне.

 

Тарăхса тулхăрать халь шуйттан,

Ирчченех кисретет армана.

Пĕр Черчен çеç çĕрле хушăран

Йыхăрать тет хăйне пулăшма.

 

Çерлерен вăл тухса шыв хĕрне

Турать имĕш хăй вăрăм çӳçне.

Чĕрине тунсăх пуснă чухне

Йыхăрать теççĕ хăй савнине.

 

Йăлтăрать пуç турийĕ таçтан,

Хĕр мĕлки те курнать аякран.

Шăп вун иккĕ çитсе çывхарсан

Çухалать имĕш вутăш куçран.

 

Хушăран, уйăх тулнă чухне,

Хĕр йĕрри сарăлать ял çине».

Паян кун та арман пĕвине

Ял çынни каяс çук каç енне.

 

Лăпланмасть ниепле те Черчен,

Канлĕх çук хĕрĕн çамрăк чунне.

Иртнисемшĕн хӳхлет темĕнччен

Паян кун та тытса пĕвене.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн