Электронлă вулавăш

Ăсатрăм çулçă — сарăм хыççăн сарăм.

Мана ăсатрĕ çулçă, ыр сунса.

Умри çул кăкăрне нумай таптарăм,

Ыран патне çитесшĕн ăнтăлса.

 

Мĕн чухлĕ шухă ĕмĕт парнелерĕм!

Мĕн чухлĕ парнелерĕм чĕр вăй-хал!

Анчах Ыран —

— Çитет! — теме пĕлмерĕ.

Мĕн чул парсан та... Пурпĕрех — сахал.

 

Çул иртнĕçем ӳссех пырать-çке парăм...

Те тупсăм ытларах?

Те çухату?

Умри мăн çул...

Шавах чупать, мăнтарăн...

Унпа пулмарĕ пурăнса тату.

 

Умри мăн çул...

Ытарлă ăш çунтармăш —

Чуна вăратнă, сывă ырату.

Ăçта-ши яшă чухнехи пултарăм?! —

Текех ман пулмĕ ĕнтĕ çухату!

 

Каллех тапса килет ума хĕв шухăш!

Кĕрхи сăнра пĕр чĕптĕм çук синкер.

Унчченхиллех пулам-и, акă, шухă?! —

Вак-шак нушашăн тухмĕччĕ тинкем!

 

Пĕлӳ те, вăй та ĕнтĕ халĕ хаклă.

Пĕлетĕп эпĕ перекет мĕнне.

Кун-çул ăшши илемлĕ те артаклă,

Шав илĕртет вăл, шантарса çĕнне.

 

Анчах каять карти-карти хур кайăк...

Шутларăм, хĕрĕх саккăрăн иккен.

Чун хĕсĕнет вĕсем ăсаннă майăн.

Ман кăмăл-сунăм уйрăлчĕ икке.

 

Пурăннă чух пурнас та пек. Ĕçлес пек.

Пурне те ĕлкĕрес пек туйăнать.

Тен, çавăнпах перекетне пĕлместпĕр?! —

Пĕлӳ те, хал та шелсĕр тăкăнать.

 

Иртен çулсем çĕтмеççĕ, тен, хыпарсăр?

Кĕтеççĕ, тен, мана таçта малта?

Çав суд умне тăрсан, — пулаймăн харсăр,

Тӳрре тухмашкăн тупăнмĕ сăлтав...

 

Ах тур анчах! Çав суд-шим ман Ыранăм?

Те ырласа кĕтес? Те — хурласа?

Манра вăл тӳрĕ кăмăллăх шыранă.

Курасшăн пулнă ман чуна таса.

 

Ун кăмăлне епле эп тивĕçтерĕп?

— Вуншар çулсем пуçтарнă опытах

Çитет! — тесе-и эп ăна пĕлтерĕп?!

Ырри, усалĕ... Кĕрĕ-ши шута?!

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн