Электронлă вулавăш

Нумаях пулмасть, Çĕнĕ çул уявĕ кĕрлесе иртсен, кĕтмен çĕртен Тилĕ Йăванне тĕл пултăм. Мана асăрхасан вăл пылак ĕмкĕч хыптарнă сăпка ачи пекех хĕпĕртесе ӳкрĕ.

— О, Кенашка! Сана курманни — çур ĕмĕр! Ăçта çухалса çӳрет-ши ку? Таçта укçа çапма тухса сулланман-ши? — тесе шухăшлатăп. Вăт ку — тĕлпулу! Ăна «çăвасах» пулать, тăванăм, — тулта самаях ăшă çанталăк пулин те тăр-тăр чĕтрерĕ Йăван. Унтан çăра шăртпа витĕннĕ янахне сăтăркаласа çапла ыйтрĕ:

— Санăн паян ĕçсем пур-и?

— Нимех те çук, — тетĕп пуш хутаçа силлесе. — Акă, арăм ĕçмелли-çимелли туянма кăларса ячĕ.

— Юрĕ-ха, вăл ниçта та тармасть. Эпĕ урăххи пирки... Динăна «майлас» кăмăл çук-и?

— Эп... Мĕн... — мăклатрăм Дина камне аса илме тăрăшса. — Ют пахчари улма-çырлапа киленме хăнăхман та... Халь тин, хăрах урапа ватлăхалла ярса пуснă хыççăн, иртĕхсе çылăха кĕме кирлех-ши?

— Мĕн çылăхĕ унта! — хĕрсе кайрĕ Тилĕ ывăлĕ. — Куç пĕк тăрă та тап-таса вăл!

— Çук пуль, — çаплах иккĕлентĕм эпĕ, — тем тумалла ĕнтĕ... Ку тарана çитсе арăма улталаса курман та...

— «Арăм, арăм!» — йӳççĕн кулчĕ Иăван. — Вара мĕн? Унашкал «тупра-мул» манăн çук тетĕн-им? Арăм кăна мар, сĕтел хушшинче апат ыйтса кашăк шаккакан шĕвĕрккесем те виççĕн тан!

— Вăт-вăт, хăвах куратăн: текех çирĕм çулти аскăнсем мар эпир санпа — çемье тăллипе тăлланнă арçынсем... Тепĕр тесен вăхăчĕ те хĕсĕкрех-ха манăн: хуняма карчăкĕ патне вĕри икерчĕ çиме каймалла. Арăм хăвăртрах таврăн тесе хытарсах кăларса ячĕ.

— Тьху, каллех «арăм»! — тарăхма пуçларĕ Тилĕ. — Сана мĕн унăн çумне сăнчăрпах кăкарса лартнă-им? Вăхăтушăн вара ытлашши ан кулян: Кăтра Маруç кунтан инçе мар, темиçе çурт урлă кăна пурăнать. Вун-вун тенкĕ тыттаратпăр та — пулчĕ те! Хăвăртти те хăвăрт, йӳнĕ те... Ăнлантăн-и, «щлепке»? — ахăрчĕ Йăван иртен-çӳренсене хамăр çине пăхтарса.

— Чим-ха, паçăр эсĕ Дина терĕн, халĕ вара — Кăтра Маруç...

— Çапла, «Дина», — килĕшрĕ Тилĕ. — Анчах та ăна Кăтра Маруç сутать-çке-ха!

— Нимĕн те ăнланмастăп...

— Сана ăнланма кирлех те мар: пĕччен мар, манпа пĕрле пыратăн! Юрать-и? Дини вара чăн та чаплă: пăхма та илемлĕ, пуçа та лайăх çавăрать! Ахальтен мар кăмăллаççĕ ăна арçынсем... Лешне вара, пуç шăмми айне «Ĕçме юрамасть — наркăмăш!» тесе çырнине, ан ĕнен, суяççĕ! Мĕн чухлĕ лĕрккемен-тĕр эп çав шĕвеке — пур пĕрех чĕрĕ-ха, аптрамастăп. «Чăваш хырăмĕнче пăта та çĕрнĕ» тесе ахальтен каламаççĕ иккен.

— Итле-ха, — пӳлтĕм Йăвана, — мĕнле шĕвекпе аташатăн эсĕ?

— Хă! Эс, тем, çӳлти патшалăхран йăтăнса аннă тăмсай мар пулĕ-çке? — чăр-р! пăхрĕ ман çине Тилĕ. — Çак тарана çитсе те «дина» мĕнне пĕлместĕн пулать те — мĕнле арçын эсĕ çакăн хыççăн? Денатурат тенине пĕлтерет вăл, тăмана!

— Эпĕ вара... эсĕ пĕр-пĕр çăмăлттай хĕрарăм пирки калать тесе. Вăт, мĕн иккен...

— Юрать, Иван Степанович, — терĕм «2» паллă илнĕ шкул ачи пек айăплăн. Хам вара çапла шухăшларăм: «Эй, Турă! Мĕн кăна курмăн-илтмĕн ку тĕнчере. Каçарсам, çӳлти аттемĕр, хăвăн хĕрĕх çул пурăнса та ăса-тăна кĕрсе çитеймен айван сурăхна...»