«Утă уйăхĕ...»

Сăкăт Ванькки | Сăвă | 2000 | ĕне | кĕтӳ | 1 116


Утă уйăхĕ... Хĕвеллĕ

Çут тĕнче çиçет.

Пур енче те куç кĕретлĕ

Пурăнăç вĕрет.

 

Улăх тăрăх ĕçлĕ халăх

Утă хатĕрлет:

— Çиттĕр, — теççĕ, — хĕл каçмалăх, —

Хăлхана кĕрет.

 

Кӳл хĕрне шыв ĕçме анчĕ

Çывăхри кĕтӳ.

Шыв ăшне кĕрсе лăпланчĕ

Пиçнĕрен ӳт-пӳ.

 

Ах, анчах шăна-пăванĕ

Ут-пĕве çурать.

Хӳтленсе ĕне ăравĕ

Çума çум тăрать.

 

Вăхăт иртрĕ... вăхăт шурĕ...

Иртрĕ кăнтăр ен.

Ĕнесем тапранчĕç, курăк

Çимелле вĕсен.

 

Умлă-хыçлă шывран тухрĕç

Шăппăн ĕнĕрсе.

Кай енне вăраххăн утрĕç

Шăрăхран сĕнксе.

 

Хӳресем кăна выляççĕ

Ĕнесен ку кун.

Пăвансем вăйпах лараççĕ —

Ĕçмеллех вĕт юн.

 

Ĕнесем хӳре тăратрĕç,

Кайрĕç ĕрĕхсе:

Пĕр самант — куçран çухалчĕç

Вĕтлĕхе кĕрсе.

 

Сĕрлекен шăна-пăванĕ

Вĕçрĕ йĕрлесе.

Урлă-пирлĕ, каллĕ-маллĕ

Çиçĕм пек çиçсе.

 

Хыççăнах кĕтӳ ачийĕ

Чупрĕ вĕтлĕхе —

Юн ĕмен пăван картийĕ

Татрĕ канлĕхе.

 

Улăхри çын асăрхарĕ

Тарнă кĕтĕве.

Хăй вара çапла каларĕ

Хăлхана кĕме:

 

— Эй, эккей! Кĕтӳ çухалчĕ

Тăратса хӳре...

Хӳре вăл ĕне çуначĕ

Ĕрĕх кĕтӳре.

 

Çĕрĕм-шывăм, вĕтлĕх-улăх

Ытлă тăван ен.

Ку вăл пурлăх, пурлăх-тулăх

Пуçтарса илсен.

 

Утă, 2000.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: