Хĕвре пăхса ӳстернĕ шанчăка...

Хĕвре пăхса ӳстернĕ шанчăка

сан кутамккун пĕр кĕтесне хурам-и?

Эп хам паян юлсассăн та çука,

пӳспе тирпейлĕн чĕркесех парам-и?

Инçе çула тухатăн-çке. Унта

тумхахлă тĕттĕмлĕх те, тем те пур-тăр.

Апла ман шанчăк санăн аллунта

куçсăррисен туйи пек кирлĕ пултăр.

Пулăшмалла-çке пирĕн пĕр-пĕрне,

ӳстерĕп-ха, ан хăртăр çех тымарĕ.

Кайран, эп хам çула тухас чухне,

мана хăй шанчăкне

теприйĕ парĕ.

1977, майăн 7-мĕшĕ, Шупашкар

Çĕнĕ комментари хуш