« Ăçта эс, манăн тунсăхлă кĕслем?..»

С.Асамата

Ăçта эс, манăн тунсăхлă кĕслем?

Сана тахçантанпах алла илмен эп.

Ĕсĕклесем, чĕрем, ĕсĕклесем...

Куççулĕм юх — эп саншăн именместĕп.

Çак чунсăр, тĕксĕм, сулхăн тĕнчере

Никам та никама та шеллемест-мĕн.

...Шеллеттерес килет-çке пурпĕрех,

Шеллеттерес килет хăйне этемĕн.

Эп этем мар-им? Ман чĕре, ман чун

Суранланса та ыратмастъ теетрим?..

Эсир хаваслă эп хурланнă чух.

Е хăвăр хурланассăр çук теетрим?

Ăçта эс, манăн тунсăхлă кĕслем?

Сана тахçантанпах алла илмен эп.

Ĕсĕклесем, чĕрем, ĕсĕклесем...

Куççулĕм, юх — эп саншăн именместĕп.

Çĕнĕ комментари хуш