Покровский соборĕ умĕнче

Николай Ишентей | Сăвă | 650


Мускав. Астăвăм керменĕ.

Пурнаççĕ унта музăсем.

«Чулран ăсталанă поэма», —

Калаççĕ иртен-çӳренсем.

 

Собор ирхи шуçăм пек çиçрĕ —

Пуç тайрăм асамлă алла.

Каçар, ятсăр чулçă! Çак ĕçшĕн

Ятна ылтăнпа çырмалла.

 

Ахаль хапха мар эп уçатăп,

Яр уçăлчĕ вăхăт хапхи:

Вунулттăмĕш ĕмĕр хуçа пек

Хăна кĕтме тухрĕ хайхи.

 

Шала пĕр-ик утăм тăватăп —

Тинкерчĕç куçран ĕмĕрсем.

Хĕм сапрĕ асамлăх хăвачĕ,

Хӳхлеççĕ тевет пек чулсем.

 

Чул мар, музăн типнĕ куççулĕ

Çĕртен тӳпене калланать,

Ят-сумсăр ăстаçăн кун-çулĕ

Аставăм пулса вуланать.

 

Чулран ăсталанă историн

Тăмхи паллă пулчĕ: «Çынна

Чунри мулĕ вилĕмсĕр турĕ,

Ытти йăлт куçать тусана».

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: