«Кам армана...»

Петĕр Эйзин | Сăвă | пурнăç | 449


Кам армана,

кам вăрмана —

манăн ниçта та

каяс килмест.

 

Пĕри утать,

тепри чупать —

манăн ниçта та

васкас килмест.

 

Кам ятлаçать,

кам çапăçать —

ман никампа та

вăрçас килмест.

 

Хăшĕ вăрлать,

хăшĕ сутать —

ман никама та

шанас килмест.

 

Камшăн уяв,

камшăн пăяв —

тек пĕр сăмах та

чĕнес килмест...

 

Пурнăç хăрушă,

пурнăç айван —

манăн çапах та

пурнас килет.

 

Йывăç-и, курăк-и,

выльăх е çын —

манăн пурне те

шеллес килет.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: