Пирĕн сукмак тăсăлать хырлăх витĕр...

Николай Теветкел | Сăвă | 547


Пирĕн сукмак тăсăлать хырлăх витĕр —

çамрăк хĕвел янăравлăн кулать.

Çиçрĕ ман шухăш: ку — пурнăç кĕвви-тĕр?

Çамрăк чуна та хаваслăх тулать.

 

Хырлăх кати сирĕлсессĕн яр! уçрĕ

аслă инçетĕм кăвак чаршавне.

Хырлăх янрарĕ, йыхрав пек сас куçрĕ,

кĕчĕ ӳссе сар хирсен кашлавне.

 

Пĕчĕк ача пек вара хĕпĕртерĕç

Пирĕн чунсем килĕшӳлĕх тупса.

Пуçсăр çилсем чикеленчĕç, вĕркерĕç,

иртрĕç кунсем тĕркешӳлĕн чупса.

 

Сисрĕн, тăванăм: тăвăллăн, анлăн

аслă инçетлĕх сасси çывхарать.

Итлĕн ăна эс, тăнлăн — ăнланăн:

ку — пирĕн ĕмĕр утти сас парать!

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: