Арман пĕви е çутă Энĕш...

Иван Вашки | Сăвă | Энĕш | 1 063


Арман пĕви е çутă Энĕш,

Е улăх çумĕнчи ката —

Вĕсем ачалăхри киленĕш,

Вĕсем асамлă маншăн та.

 

Çӳреттĕмĕр, шутне пĕлмесĕр,

Шыва кĕме эпир çулла,

Пулман-тăр шуххăн иртĕхмесĕр

Хăпарнă чух та ялалла.

 

Çарран чупма чĕнетчĕ улăх...

Еплеччĕ выртмари каçсем!

Вăлтапала хам тытнă пулă

Ĕнетчĕ вут çинче пиçсе.

 

Ыттисенни пек мар сас панă

Çӳрен лашамăн хăнкăрми,

Куçа хупмасăр тек тăнланă

Ун кĕввине эп çухатми.

 

Пуçланчĕ, çутăлчĕ çĕн вăхăт

Шкула уй урлă çул тытсан,

Пăхмасăр калама сăвва ху

Ăшра ĕнерĕшсе утсан.

 

Атте тăратчĕ илĕм-тилĕм

Хĕлле çуна кӳлме, кайма;

Тăман, çил витĕрех çĕмиллĕн

Лавсем шăватчĕç йăлăма.

 

Атте вут турттарса килӳçĕн

Шăп таврăнаттăм эпĕ те.

Çуртри-мĕнри çемьемĕр ĕçĕ

Туллин пайланнă пирĕнте.

 

Çапла халь куç умне ӳкеççĕ

Чечен ачалăх çулĕсем,

Е сала кайăк, е чĕкеçĕ

Арпалăх çийĕн вĕçнисем.

 

Çитетчĕç янкăс уявсем те,

Килетчĕ савăш утăçи;

Сухалани, тыр вырнисем те

Хирте хăвал уçмастчĕç-им?

 

Ӳсен пĕлевлĕх пил-кăвар-тăр

Яшсем кĕтен тивлет валли.

Мĕн пултăр-ха, тата мĕн пултăр

Çуралнă çĕршывран хакли?

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: