Миккалай

Анатолий Юман | Сăвă | 997


Вăрçă пынă çулсенче,

Астăватăп лайăх:

Пурччĕ Чăвашкассинче

Колхоз Миккалайĕ.

 

Килĕ-çурчĕ çукчĕ ун,

Çукчĕ ашшĕ-амăш,

Ăçта кайтăр мĕскĕн чун?

Шăпи çапла имĕш.

 

Кам ачи вăл, кам тавраш?

Пур-и хушамачĕ?

Мана пĕчĕкçĕ Гаврош

Евĕр туйăнатчĕ.

 

Лутра пӳллĕ. Çаврака,

Хура питлĕ-куçлă

Çакă пĕчĕк çамрăка

Çăлчĕ пирĕн туслăх.

 

Пуçлăхпа пĕррехинче

Калаçать те ыррăн,

Леш правлени çуртĕнче

Тупса панă вырăн.

 

Хуралçăпа вăл унта

Шав выртса тăратчĕ.

Хушăран унта-кунта

Ĕç хушсан чупатчĕ.

 

Ман анне кайран тата

Тĕл пулса калаçрĕ.

Çав кунран ача шкулта

Вĕренме пуçларĕ.

 

Çĕн фуфайкăпа кĕпе

Ун валли çĕлерĕ.

Тăлăха мĕн пуррипе

Вăй парса çĕклерĕ.

 

Пулса иртнĕ пек ĕнер,

Астăватăп лайăх:

Ӳссе çитĕнчĕ чипер

Колхоз Миккалайĕ.

 

Халь ăçта вăл? Кам пĕлет?

Кайрĕ те – çухалчĕ.

Хушăран аса килет

Тăлăх ача ячĕ.

 

Çулсем иртрĕç васкаса,

Шурĕç пĕлĕт евĕр.

Таврăнаймĕ çаврăнса

Иртсе кайнă ĕмĕр.

 

Ку чухне Миккалайсем

Калама çук йышлă.

Вĕсене, тăванăмсем,

Ӳстересчĕ ăслă.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: