Электронлă вулавăш

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

Пӗлме: хайлавсем вырнаҫтармалли йӗрке.

Чунра юрă шăранса тухсан,

Уй-хире ăш çил пулса вĕçсен,

Эп çӳретĕп пуçăма ухса:

Тӳпе — янкăр, кăмăллă çынсем.

Шăрçаланать халь пурнăç тексчĕ,

Çапать машинка сас палли.

Кашни сăмах халь пурнăç терчĕ,

Кашни страница сан валли.

Эс пурнăç нушине курманччĕ

Мĕнле тертпе вăл килнине.

Ак çитрĕ те çав терт саманчĕ

Çырма пуçларăм çын чунне.

Çук, тăмран мар вăл çыннăн чунĕ,

Çук, кирпĕч мар пуль сас палли.

Анчах мĕн чухлĕ автор юнĕ.

Юхса пуль кĕнеке тулли.

Тухать халь сас палли, сăмахĕ...

Пуçтарăнать пĕр ăс пуххи.

Мĕнле асам тĕнчен юмахĕ

Ку кĕнеке пек калĕ-ши?

Ĕлĕк-авал пĕр ялта,

Темиçе çĕр çул каялла,

Хурашывăн хĕрринче,

Некей çуралса ӳсет.

Некей мăн аслашшĕне

Чумей-мăрса тенĕ тет.

Вăл хăй пĕчĕк мăнукне

Вĕрентнĕ тет çар ĕçне.

Ухăран тĕл пенипе

Пулман ăна çитекен.

Сăнă ывăтнă чухне

Никам та çĕнтереймен.

Тĕлĕннĕ çак Некейрен:

Урса кайнă вăкăра

Чукмар пек чăмăрпала

Пултарнă тет вĕлерме

Çӳренĕ чух вăрманта

Хăранă унран упа.

Паттăрăн вăйне сиссе

Кайнă тет тара-тара.

* * *

Хурашывран инçех мар,

Вăрманпа çывăхарах,

Вырнаçнă кăнтăралла,

Тихăнушкăнь ятлă ял.

Вăрмантан, пĕр çырмаран,

Пуçланать пĕр шыв юххи.

Хоршевашка ят парса

Хăварнă ăна тахçан.

Ку тавралăх пит капмар,

Тыткăнланă илемпе.

Кирек кам та çакăнта,

Туйнă пурнăç таппине.

Хоршевашка юхан шыв

Элĕк районне çитет.

Çирĕм çухрăм тăсăлса

Малалла

Çĕрлехи урамра хĕрарăм йĕни илтĕнчĕ, унччен те пулмарĕ — хăна çурчĕпе юнашар тăкăрлăкри тротуар çине тимĕр татăкĕ чанклатса ӳкрĕ.

Балкон çине тухнă арçын пулăшу ыйтса кăшкăракан хĕрарăм сассине илтрĕ те аялти хута анчĕ, анчах унта туристсене кирек хăш вăхăтра та йышăнса вырнаçтаракан араба та, талăкĕпе телефон умĕнче ларакан хĕр оператора та, кашни каç вестибюль урайне çăвакан тарçа та, кунĕн-çĕрĕн çурт умĕнчи будкăра тăракан полицейские те — никама та тупаймарĕ, вара пĕчченех ансăр тăкăрлăкалла ыткăнчĕ.

Тĕттĕм кĕтесре ăна сасартăк такам пуçран йывăр япалапа çапрĕ. Тăнне çухатнă çын тротуар çине ӳкрĕ...

Улăхра пуç кăшăлĕ эп çыхрăм,

Йăл кулса эс тăтăн ман умра.

Иртнĕ вăхăт.

Çухрăм хыççăн çухрăм

утрăмăр.

Хĕм йăлкăшрĕ куçра.

Вăхăтăн çул-йĕрĕ çăмăл марччĕ,

Çăмăл марччĕ телее тупма.

Халь пĕрле утмастпăр... туспăх тарчĕ —

Ан ыйтсам пуç кăшăлĕ çыхма.

Кĕçтенттин Ивановăн çĕршывĕ

Илĕртӳллĕн чĕнет хăй енне.

Чечексем, курăксем, тĕрлĕ йывăç

Парнелеççĕ пире илемне.

Тăвансем! Илсе килтĕмĕр эпĕр

Инçетрен Сире пысăк салам.

Пурнăçра тӳрĕрех утас тетпĕр

Иванов ячĕпе малалла.

Тĕнче çийĕн ялан янăратăр,

Чăваш Пушкинĕ, санăн яту!

Тăван халăх куллен аталантăр,

Пурăнар, чăвашсемĕр, тату!

Çутă кĕтме тытăнатăп

Эпĕ Çĕн çул çитеспе...

Пĕчĕк пĕр елка лартатăп —

Чăрăш çути килтĕрех!

Килтĕр-ха, тетĕп, çав чăрăш,

Кĕтĕр-ха, тетĕп, шăрши.

Эпĕ пулса пуль, тен, чăркăш

Халь ак пулам Хĕл Мучи!

Пулăп та — чăрăш та ларĕ

Хăй куççульне кăларса.

Кам-ха мана халь каларĕ —

«Чăрăш пек эсĕ таса!»

Чăрăш пек, чăн та, ларатăп.

Чăрăш пек, чăн та, пĕтеп...

Пĕчĕк хунар çутса ярăп —

Эпĕ сана вĕт кĕтеп!

Эпĕ сана вĕт кĕтетĕп,

Пулăн-ха, тен, кун çути.

Тен, çавăнпа та пĕлетĕп

Чăрăш лартма каç пултти.

Кĕвĕллĕ уçă шыратăп

Çак тĕнчене уçма.

Хам та ача пек пыратăп,

Пĕр мечĕк çапса урампа...

Анчах та тĕнче вăйă мар-тăр,

Пурнăçăм сцена мар.

Такам ахалех каланă —

Эпĕ артист мар!

Пĕрех темĕскер шыратăп,

Çак пурнăçра куç тулли.

Çак кĕвĕре, тен, тупатăп

Чун уççине хам валли.

Чуна хамăнне уçсассăн,

Тĕнче те вара уçăлать,

Эпир те кунтан кайсассăн,

Сире валли вырăн юлать...

Кĕвĕллĕ уçă шыратăп,

Çынпа уçăрах пулса...

Тен, эпĕ телей куратăп,

Çакă юрра юрласа?

Алăк çинче — çакăн пек çырнă плакат.

Алăк умĕнче — шала кĕме кĕтекенннисем. Лараççĕ, ура çинче тăраççĕ, сăн-пичĕсенче вĕсем кĕтсе йăлăхса çитни палăрать.

Мăн куçлăхлă лутра этем шалти пӳлĕмре чӳречепе алăк хушшинче урай хăмисем тăрăх каллĕ-маллĕ уткаласа çӳрет. Май мар пысăк шухăш ун пуçĕнче.

«Çур çитрĕ. Хĕвел вăйĕ сметăра кăтартнинчен ытларах тухать. Тьфу! Мĕн каласа хутăм! Çӳлти хĕвел вăйĕ, хĕвел вăйĕ сметăсăрах расхутланать-ха вăл. Нда!.. Учрежденире çурхи илеме тивĕçлĕ реорганизацисем тумалла...»

Хăйхискер вăшăл-вашăл сĕтел хушшине кĕрсе ларчĕ. те блокнот çине çыра пуçларĕ. Тăват-пилĕк сăмах çырать те шухăша кайса ларать. Шухăша кайса килнĕ хыççăн каллех виçшер-тăватшар сăмах çырса хурать.

Çур сехете яхăн, çапла шухăша кайса, çыра-çыра ларчĕ. Унтан кабинетĕнчен, вăхăтлăха пулас, тухса шурĕ.

Вулаканăм, эпир иксĕмĕр ун сĕтелĕ çинех тăрса юлнă блокночĕ çине мĕн-мĕн çырса хăварнине вăрттăн вуласа пăхăпăр. Акă мĕн çырнă унта вăл:

«Çура тухнă май хамăн учрежденире çакăн йышши ĕçсем.тусă ларакан пайсемпе сĕтелсем тата комиссисем уçасси çинчен шухăшласа пăхас:

Малалла

Кĕçтенттин Иванов ялĕнче

Ирлĕ-каçлă куккук авăтать.

Çĕмĕрт, хурăн — вăрманлă тĕнче

Сăвăç утнă çула астăвать.

Инçетрен паллашма Слакпуçпа

Килнĕ чух ман чĕре хумханать.

Пăлханса тинкеретĕп куçпа —

Асилмешкĕн кайран çак куна.

Кам ан çунтăр килесшĕн кунта,

Нарспипе ун каччин çĕршывне?

Чунĕ кашни чăвашăн туртать

Çак сăваплă хитре ял енне.

Хушăлка ялĕнчен Тăхтаман

Вăрман витĕр утпа килет пек.

Çамрăк каччă Сетнер те паян

Тĕл пулса пуплес пек пирĕнпе.

Янăрать пек Нарспи юрлани

Шăнкăр-шăнкăр çырма хĕрринче.

Ун Сетнерĕ, юратнă савни,

Ачашлать сар хĕре аллинчен.

Шăхличпе, ав, кĕтӳç шăхăрать,

Тăрăс-тăрăс! сикет путекки,

Михетер ăйăрне шăварать,

Çывăхрах сас парать шывсикки...

Кĕсле тăвĕ çине улăхсан,

Курăнать таврана пит инçе.

Çывăрать-мĕн çыравçă Ухсай

Вăранми ыйхăпа ту çинче.

Чăваш ялĕ Слакпуç çĕрĕнче

Уйрăмах илĕртеç чечексем.

Малалла