Балтика тинĕсĕ анлă,
Унта шыва кĕтĕм кăçал.
Хура тинĕс ăшă, тăварлă,
Хитре те мăнаçлă Байкал.
Охотка шавлать. Хумĕ çӳллĕ.
Штормсем алхасаççĕ темччен.
Яппун тинĕсне эп хĕрӳллĕн
Чăма-чăма тухрăм унччен.
Иртыш, Енисей, Аслă Атăл,
Шур Атăл, Амур, Ангара,
Дон пек çырмасем, эп калатăп,
Пĕрре те çук пирĕн патра.
Анчах та питех кулянмастăп
Пулсан та вĕсем пит инçе:
Кĕмешкĕн шыва эп манмастăп
Тăван Кинчеккей пĕвинче.
Ал вĕççĕн ăна пĕвеленĕ,
Тăпра та хăва турттарса.
— Ан кайтăр татса пĕве, — тенĕ,
Лаптак чулсемпе нăкăтса.
Тип-тикĕс пĕвен виçĕ енĕ,
Тăваттăмĕш енĕ-вăрман.
Кунта эп ишмешкĕн вĕреннĕ
Пĕрле туссемпе ачаран.
Миçе çын кунта савăнман-ши,
Ишсе те чăмса пĕчĕкрен?
Чи чаплă шыв лаптăкĕ маншăн —
Тăван ял пĕви тĕнчере.