Самсун ялтан пуйăспа таврăнчĕ. Шупашкарта вокзал умĕнчи лапама тухсан паллакансем çук-и тесе йĕри-тавралла пăхса илчĕ. Пур иккен, çывăхрах Агафон тăрать. Кӳршĕ çуртра пурăнаканскер. Ун патне пырса сăмах хушнăччĕ çеç — тахăшĕ Самсуна хул пуççинчен хыттăн çатлаттарчĕ.
Манул Савиткин! Вĕсем пĕр ялтан. Заводра ĕçлет.
— Ăçтан эс капла? — Самсун сарă-хăмар шлепкепе çĕнĕ костюм тăхăннă пĕлĕшĕ енне тăрăхлавлăнрах пăхса илчĕ. — Ват хусах пуçупа авланма шутламарăн пуль те?
Савиткин тĕлĕннипе куçне-пуçне чарса пăрахрĕ.
— Эс мĕнле пĕлен?
Самсун ахăлтатса ячĕ. Шӳтлесе çеç каларĕ те — шăпах тĕл тивертрĕ иккен! Манул паян чăнах та авланать-мĕн. Каçпа хĕр илме каймалла. Пулас арăмĕ Шупашкартан çирĕм çухрăмри ялтан.
Çав вăхăтра Агафон пăрăнса утрĕ. Тепĕртакран кусем те автобуса ларма васкарĕç. Самсун сумка çĕкленĕ, Манул — чăматан. «Мир» кинотеатр патĕнче анса юлчĕç.
— Апла кĕтетĕп сана, — терĕ Манул хĕр илме каймашкăн Самçун та килĕшнипе савăнса.
— Юрĕ... Эй-эй! — кăшкăрса ячĕ юлташĕ. — Авланас шухăшпа пуçна пачах çухатмарăн пуль те. Чăматанна хăвартăн!
Манул картах каялла çаврăнчĕ.
— Чăматан? Ман нимле чăматан та çук.
— Ку вара?
— Пĕлмес. Эп санăн тесе. Пулăшмалла çĕклерĕм те...
Пĕр-пĕрне куçран пăхрĕç. Вĕсем такам чăматанне çаклатса килнĕ. Чим, хайхи Агафонăн мар-ши? Кам пĕлет... Халь мĕн тумалла ентĕ?
— Вокзала каялла кайма тивет, — сĕнчĕ Самсун. — Хуçине çавăнта шырамалла. Агафон-и вăл, урăххи-и...
Анчах вĕсем автобус чарăнăвне çитме те ĕлкĕреймерĕç — юнашарах милици машини çухăртса ячĕ.
— Çавă, çавă, шăпах ман чăматан! — Автомашинăран милиционерпа пĕрле тăрнаккай çын сиксе тухрĕ. — Тытăр вĕсене!
Икĕ туса темиçен хупăрласа илчĕç.
— Э-э, лекрĕр-и? Вăрăсем!
Калаçу малалла милици уйрăмĕнче тăсăлчĕ. Агафона чĕнтермен пулсан хăйсем айăпсăррине хăвăртах ĕнентерме май килĕччĕ-ши — пĕлме çук. Телее, лешĕ киле çитме ĕлкĕрнĕ-мĕн.
Мĕн пулса иртнĕ-ха вокзал патĕнче?
Пуйăс килнĕ чухне Агафон шăпах лапамра чарăннă-мĕн, вакунсенчен туха-туха автобус-троллейбус, такси еннелле васкакан çынсене сăнаса тăнă.
— Калăр-ха, эрех ăçта сутаççĕ кунта? — илтĕннĕ çав хушăра. Сайра сарă сухаллă тăсланкă çын унран ыйтать-мĕн. Агафон вокзал çывăхĕнчи лавкка еннелле пуçĕпе сĕлтнĕ.
— Итле-ха, юлташăм, — тенĕ вăрăмкка. — Турă пул, тархасшăн. Чăматана сĕтĕрсе çӳреме йывăр. Лавккана çитсе киличчен çакăнта лартса хăварам-ха ăна, а? Тăхта пăртак. Эп халех!
Агафон хуравласса кĕтмесĕрех çакскер лавкканалла чуптарнă. Ку «хуралçă» тăнă-тăнă та, Самсунпа Манул пырсан вĕсене чăматан пирки асăрхаттармасăрах пăрахса кайнă. Хуçи вăт-вăт килсе çитессе шаннă ĕнтĕ. Самсунпа Манул вара чăматана çĕклесе уттара панă. Темиçе кĕленче эрех туяннă тăрнаккай каялла персе çитет: Агафон та, чăматан та çук! Вара шăв-шав çĕкленĕ.
Самсун çак путиш çинчен юлташĕсене каласа кăтартсан лешсем ĕненмерĕç: чăматана палламан-туман çынна кам ухмахĕ парса хăвартăр.
Самсун йăл кулса ячĕ:
— Халĕ мар, вăтăр çул каялла пулса иртнĕ вăл.